Me søkjer fysioterapeutar med interesse for rehabilitering! 

Ergo- og fysioterapitenesta

Er du vår nye fysioterapeut?

Foreldrepermisjonar i tenesta gjer at me har behov for to fysioterapeutar. Ergo- og fysioterapitenesta i Bømlo kommune består av fire fysioterapeutar, fire ergoterapeutar, logoped og leiar. I tillegg er det fem avtalefysioterapeutar i kommunen. Me er eit arbeidsmiljø med fleire unge terapeutar og godt samarbeid. Me kan tilby ein arbeidsplass med stort fagleg engasjement og inkluderande arbeidsmiljø. Vil du jobbe hos oss eit år eller kanskje meir? Vikariata er med oppstart snarast og til 15.08.27.

Arbeidsoppgåver

Ergo- og fysioterapitenesta yt teneste til innbyggjarar over 18 år i heile kommunen; både i heimar, på institusjonar og poliklinisk. Det er tett samarbeid innad i tenesta, og med andre faggrupper og tenester i heile kommunen.

Du får som fysioterapeut hos oss jobbe med m.a. rehabilitering. Den eine vikaren vil jobbe i heimerehabiliteringsteamet, og den andre med døgnrehabilitering. Begge fysioterapeutane vil ha treningsperiodar med ulike pasientar, heimebesøk/heimebehandling, tilrettelegging/kartlegging og jobbe med hjelpemiddelformidling.

Oppgåver blir tillagt stillinga avhengig av m.a. den tilsette sin kompetanse og interesser. Endringar i arbeidsområdet må kunne påreknast. 

Kvalifikasjonskrav

• Autorisasjon som fysioterapeut. Me vil oppmoda nyutdanna til å søkje.
• Gode norskkunnskapar både skriftleg og munnleg.

Det er ønskeleg at du har:

• Førarkort klasse B (tenesta har leasingbilar).
• Erfaring /praksis frå rehabilitering, kommunehelsetenesta, hjelpemiddelformidling, og/eller arbeid med vaksne/eldre.

Personlege eigenskapar

• Du arbeider sjølvstendig, er engasjert og løysingsorientert.
• Du har gode samarbeidsevner og trivst med tverrfagleg arbeid.
• Du kommuniserer tydeleg og skapar tillit.
• Du er fleksibel og tilpassingsdyktig i møte med ulike situasjonar.
• Du har eit positivt menneskesyn og ønskjer å bidra til meistring og deltaking.

I vurderinga legg me vekt på utdanning, erfaring og personlege eigenskapar, samt din motivasjon.

Me tilbyr

• Ein arbeidsplass med stort fagleg engasjement og inkluderande arbeidsmiljø.
• Varierte arbeidsoppgåver som gir både fagleg og personleg utvikling. 
• Gode offentlege pensjons- og forsikringsordningar.
• Fleksibel arbeidstid.
• Løn og arbeidsvilkår i samsvar med gjeldande lov og avtaleverk.
• Medlemskap med tilsettegoder i velferdsklubben.

Busetnad på Bømlo kan gje rett til nedskriving av studielån etter ny statleg ordning frå 1.1.2026, i tråd med gjeldande vilkår.

Anna informasjon

• Det vert stilt krav om politiattest ved tilsetjing etter Helse og omsorgstenestelova § 5.4. 
• Bømlo kommune ser på inkludering og mangfald som ein styrke, og vil oppmoda alle kvaliserte søkjarar om å søkja stilling uavhengig av bakgrunn. 
• Me gjer merksam på at søkjarar vert ført opp på offentleg søkjarliste. Det er mogleg å søkja om anonymitet, men det må vera særskilte omstende for å få innvilga unntak, jf. Offentleglova § 25.

Synast du stillinga virkar spennande og samsvarar med kvalifikasjonane dine, sender du oss søknaden din elektronisk via Webcruiter.no med CV, vitnemål og attestar vedlagt. Ved førespurnad må du kunna skaffa bekrefta kopiar av dokumentasjonen din. Dersom du har spørsmål om stillinga og rekrutteringsprosessen, ta kontakt med verksemdsleiar Kathrine Tislevoll Nygård.

Berekraftige Bømlo! 

Me i Bømlo kommune er stolte av å bu og jobba på ein plass der natur, næringsliv og kultur går hand i hand. Kommunen vår har om lag 12 500 innbyggjarar, og ligg midt mellom Stavanger og Bergen – i hjarta av Sunnhordland. Her finn du eit aktivt næringsliv med vekt på grøn teknologi, eit rikt kulturliv og eit mangfald av lag og organisasjonar. Alt dette gjer Bømlo til ein levande og attraktiv stad å bu, leva og arbeida.

Kven er me?

Bømlo kommune har om lag 800 årsverk. Me er utviklingsorienterte og jobbar saman for å skapa ei berekraftig samfunnsutvikling. Me legg vekt på samarbeid, innovasjon og det grøne skiftet.Våre tilsette er den viktigaste ressursen me har – og me ser etter folk som er rause, modige og engasjerte.

Kva får du hos oss?

Trygg pensjonsordning: Som tilsett får du ein av dei sikraste pensjonsordningane i landet – offentleg tenestepensjon. Den varer heile livet, ikkje berre i 10 år slik som mange private ordningar. I tillegg får du uføre- og etterlatnepensjon dersom noko uventa skulle skje.

Gode medlemsfordelar: Med pensjonsrett hos oss får du medlemspris og gunstige vilkår på bank, forsikring og spareprodukt.

Forsikringsordningar: Me tilbyr gode forsikringsordningar som omfattar yrkesskade, ulykke og fritid – slik at du kan kjenna deg trygg både på jobb og heime.

Hos oss får du ikkje berre ein jobb – du får høve til å vera med og forma framtida til Bømlo.